Tgi che nus essan – Tge che nus faschain
Ils champs d'activitad da Pro Helvetia
Promoziun da la cultura en Svizra - Ils Acturs
Tgi che nus essan – Tge che nus faschain
Dapi passa 60 onns è la Fundaziun svizra per la cultura Pro Helvetia responsabla per la represchentaziun culturala da la Svizra a l'exteriur, per il dialog cultural tranter las differentas regiuns linguisticas e per la promoziun dals arts en il context surregiunal. Cun sia activitad sustegna ella ina Svizra culturalmain multifara, contemporana ed averta.
Istorgia e basa legala
En in temp d'acuta smanantscha exteriura, il 1939, è Pro Helvetia vegnida fundada sco cuminanza da lavur cun intents da defensiun e da conservaziun. Il 1949 è ella vegnida transfurmada en ina fundaziun da dretg public, cun la nova finamira da superar l'isolaziun culturala e spiertala.
La lescha davart Pro Helvetia dals 17-12-1965 dat a la fundaziun la suandanta incumbensa:
- mantegnair e tgirar la particularitad culturala dal pajais;
- promover la lavur culturala sin fundament da las cundiziuns en ils chantuns sco era en las regiuns linguisticas ed en ils circuls culturals;
- promover il barat cultural tranter las regiuns linguisticas ed ils circuls culturals en Svizra;
- tgirar las relaziuns culturalas cun l'exteriur.
Pro Helvetia oz
Realisond sia incumbensa metta Pro Helvetia oz la paisa sin la promoziun da la creaziun artistica contemporana, il barat cultural ed il dialog da las culturas en Svizra ed a l'exteriur.
Cun promoziun da la creaziun manegia Pro Helvetia il sustegn dad ovras en ils secturs da musica, litteratura, teater e saut; film, art figurativ ed art applitgà, video e fotografia vegnan promovids da l'Uffizi federal da cultura. Barat cultural signifitgescha per Pro Helvetia da far conuschent a l'exteriur las ovras culturalas svizras da tut gener e d'iniziar in dialog cun las culturas d'auters pajais. Quest dialog duai ed astga avair repercussiuns sin la producziun artistica en Svizra, ma era sin il maletg ch'ils abitants e las abitantas da la Svizra sa fan dad autras culturas.
Cultura è a medem temp locala ed internaziunala; ella è atschertament da sasez en vista al nov ed avertadad per svilups. Or da questa perspectiva s'engascha Pro Helvetia era per ina cultura populara svizra che n'è ni glorifitganta ni museala, mabain che tschertga da s'occupar productivamain cun la tradiziun guardond en l'avegnir.
Dumondas e projects
L'activitad da Pro Helvetia sa lascha divider en dus secturs: d'ina vart il sustegn da projects sin fundament da dumondas e da l'autra vart projects iniziads da la fundaziun sezza. Las dumondas fan ora la gronda part da la lavur; radund 85% dals meds operativs van a favur da projects da producents da cultura.
Per il giudicament da las dumondas giogan ils suandants criteris ina rolla: la relaziun cun la Svizra, la realisaziun professiunala, la relaziun giustificabla dals custs e dal gudogn, l'irradiaziun, la duraivladad, la relevanza sociala e - sco facturs ils pli impurtants - la qualitad artistica ed il grad d'innovaziun. Las proceduras èn fixadas en l'ordinaziun davart ils subsidis approvada dal cussegl federal sco era en il Guid per requirentas e requirents.
Uschia sustegna Pro Helvetia exposiziuns d'art, exposiziuns tematicas, occurrenzas conceptualas, preschentaziuns da films svizzers, prelecziuns, turneas da gruppas da teater e da saut, d'orchesters e d’ensembles da tut gener musical, festivals, cooperaziuns en il sectur da la scienzas umanas e bler auter. Il sustegn na sa limitescha betg mo a la concessiun da daners, mabain cumpiglia savens era cussegliaziun, intermediaziun da contacts ed agid logistic.
Cun agens projects metta Pro Helvetia accents en secturs che dovran tenor ella ina tgira speziala, saja quai singulas furmas d'expressiun u temas actuals. Da quels pon resultar gronds projects multidisciplinars che contribueschan a la chapientscha vicendaivla ed a l'intensivaziun dal barat cultural. In tratg cuminaivel da quests projects è il dialog tranter diversas culturas e cuminanzas en Svizra ed a l'exteriur.
En tut ils champs collavura Pro Helvetia cun las represchentanzas diplomaticas e consularas da la Svizra a l'exteriur sco era cun instituziuns ed organisaturs svizzers e da l'exteriur.
Finanziaziun
Dapi il 1981 vegn la fundaziun Pro Helvetia creada tras lescha federala finanziada da la confederaziun cun credits per mintgamai quatter onns, quels sa basan sin in program approvà dal cussegl da fundaziun. Davart contribuziuns a projects e dumondas decidan las gruppas da lavur dal cussegl da fundaziun ed ils manaders e las manadras da partiziun.
Sedia
Dapi la fundaziun sa chatta il secretariat da Pro Helvetia a Turitg. Qua ed en la sedia a Genevra lavuran var 78 collavuraturas e collavuraturs en tschintg partiziuns spezialisadas e trais servetschs. Cun ils centers culturals ed ils uffizis a l'exteriur (en 15 pajais) munta il dumber da collavuraturas e collavuraturs a var 117, repartì sin circa 86 plazzas a temp cumplain.
Organisaziun
L'organ suprem da Pro Helvetia è il cussegl da fundaziun. Ses 25 commembers vegnan elegids dal cussegl federal. Els sa reuneschan regularmain en las differentas gruppas da lavur per decider davart las dumondas ed ils agens projects da Pro Helvetia. Trais giadas l'onn decida il cussegl da fundaziun cumplet davart il program da l'onn ed il preventiv sco era davart dumondas da princip.
Infurmaziun
Per cumplettar sia activitad ha Pro Helvetia in servetsch da communicaziun che infurmescha en Svizra ed a l'exteriur davart finamiras, modas da lavurar e projects da Pro Helvetia sco era davart la lavur culturala da la Svizra. Cun atgnas publicaziuns promova ella en Svizra ed a l'exteriur la chapientscha per la cultura svizra e las conuschientschas correspundentas.
